بربي شنوا الفايدة في أنه يكون عندك تلميذ متميز وانت كوليّ مركبّله ألف علّة نفسية ومورثّله عُقد مستحكمة !
الدنيا ...موش قراية بركا ...الدنيا توازن نفسي
والله حرام الضغوطات اللي عاملينها على تلامذة السيزيام ...تلميذ عمره 12 سنة وتلقاه مهووس بالخوف ومحكوم بالمقارنات اللي فارضها محيطه العائلي
مختصرين التعليم في التحصيل الدراسي وهو في الأصل تربية
تلميذ متوسط تعليميا ومتوازن نفسيا أفضل من تلميذ متميز وعايش بالخوف
وإذا كان عندك تلميذ متميز ...تعامل معاه بمرونة
وإذا كان عندك تلميذ متوسط ...تعامل معاه بناء على قدراته
وإذا كان عند تلميذ متعثر...تعامل معاه بتسامح
في النهاية ...العالم مفتوح وفيه برشا آفاق ...علاش ما نخلّوش الأمور تمشي على طبيعتها والغربال يغربل ...وياما ناس متعثرين في دراستهم اليوم ناجحين في حياتهم (والعكس صحيح) وأكيد انكم الكل عندكم أمثلة حيّة تأكد أن التفوق الدراسي موش كل شي
مناظرة السيزيام بشكلها الحالي قاعدة تحطم في أجيال
لأنها تحولت من مناظرة خاصة بالتلاميذ إلى معركة "مقارنات" بين الأولياء والضحية الأول والأخير هو التلميذ
اخرجوا من وهم المقارنات
مقال للاستاذ طارق عمران
