العالم اللي جاي ماعادش فيه فرق ما بين مهندس و طبيب و جزار و سبّاح
لكل ينجم يجيب منهم الفلوس و لكل ينجم يندمج بيهم في المجتمع
خاطر اليوم تلقى مهندس استقال و مشى عمل فيرمة، تلقى بنكاجي استقال و مشى حل fleuriste
المهم من القراية ولدك يتعلم الأبجديات، يتعلم يستغل شخصيته بطريقته هو باش يكون efficace في أي حاجة يعملها
يعني أقل ما يمكن من الموارد لتحقيق أكثر ما يمكن من الأهداف
اذا ولدك عندو فرط الحركة علمو يعمل برشا حاجات صغيرة في نفس الوقت
إذا ولدك بطيء علمو يعمل نشاط كامل مالأول للآخر
إذا ولدك بخلي علمو ينهي اي مسؤولية في أقل وقت ممكن ليه
إذا ولدك ما ينجمش يحفظ بالذاكرة البصرية، علموا يحفظ بالاعادة، و الا بالتڨمير
مافماش طريقة وحدة صحيحة و عشرين على عشرين في نظام تعليمي فاشل ماهياش علامة جيدة.
يعني انت قتلت ألف موهبة في ولدك باش يجيب أحسن عدد في شهادة خارج المنافسة في العالم.
إذا ولدك قادر يجيب عشرين على عشرين من غير ما تضغط عليه و إلا يضغط على روحه، ما غير ما يخسر وقت من اللعب و الأنشطة و الحياة الإجتماعية و العائلية و ماغير ستراس و عياط، فهذا باهي برشا...
إذا باش تدخلوا بصغاركم في دوامة الضغط النفسي على خاطر الانتاج الكتابي راهو باش يخسر مالقراية أكثر ماللي باش يربح...
عصركم كان يعتمد على المسيرة الدراسية صحيح.. تقرا تعدي كونكور من كان الأفضل في الامتحان يشد هو الخدمة
العصر الجاي العلم فيه سهل الوصول إليه
ماعادش تعرف و إلا ما تعرش هي المفتاح
أما شكون انت؟ كيفاش تنجم تتصرف في الوضعية كذا؟ قدراتك الابتكارية؟ قدراتك الإقناعية؟ المجالات اللي تعرفها؟ أصحابك شكون؟ شنية نقاطك السلبية؟ شنية صفات شريك العمل المفضل؟
قداش تنجم تجيب فلوس بأقل موارد ممكنة؟
كيفاش تكون efficace؟
و العلم تتعلم في نفس الوقت
هذاكا هو المستقبل
