بقلم انيستي غادة العبيدي - مديرة رياض أطفال
اذا كنت مديرة او منشطة في روضة و تعملين في مثل هذه الظروف أنت اذا قوية و شجاعة و مغامرة ... تعملين في الصف الأمامي .. انت في الواجهة و "رد بالك تغلط" أعذارك "واهية"
و لا تتحججي بأي ظرف
هذه الظروف التي حملتك ما لا طاقة لك به . اصبحت مسؤولة على تربية و تعليم و صحة الاطفال و صحة الاطار العامل معك و "من غير مزية"
منذ خروجك من المنزل تبدأ المغامرة اليومية تعقيم نفسك تعقيم الروضة قبل دخول الاطفال ثم ينطلق ماراطون الاستقبال قياس الحرارة.. تعقيم الحقائب ..اطلب استمارة الفرز من الولي .. نحي الصباط لبس الكروكس.. حط الجال ... مع الحرص على عدم لمس الطفل و في هذا الكل انت متعرفش الي الموجود في الاستمارة صحيح و الا غالط لكن انت تقبل الصغير بثقة عمياء في الولي الي جابو...
انت تنجم تلتزم بعدم مخالطة اشخاص أآخرين .. متزورش اقاربك ..متعزيش متهنيش... متمشيش لاماكن عمومية بخلاف مغازة مواد غذائية او مواد تنظيف .. متزورش امك خاطر خايفة عليها و انت متعرفش روحك حاملة او ماكش حاملة الفيروس.. تحاول متقربش لصغارك . الي في المدرسة او الليساي خاطر هوما زادة يختلطو بمعلمين و اساتذة و تلاميذ أخرين .....
في هذا الكل انت خايفة موش على روحك انت خايفة على صغار الناس اكثر ..خاصة احنا معرضين للغلق من طرف الوزارة الي تشرف علينا كان عملنا و الا تصير غلطة.. احنا معرضين للبخص من طرف الولي الي البعض منهم لليوم ماهمش ملتزمين بقواعد الصحة رغم الي تلقاهم واقفين يشوفو فيك شنو تعمل كل صباح كيف تستقبل صغيرو كيفاه محنية تنحيلو الصباط و تربطلو الخيوط و تعطيه شلاكتو و تعمقلو يديه و حوايجو... هوما زعمة يعقمولهم قبل ميجيبوهم ؟؟ زعمة ميزوروش اقاربهم .. زعمة ممشاوش لفضاءات عمومية ؟؟؟
منحكيوش على طبائع الاطفال المختلفة و الحركية المفرطة بعد ستة شهور حجر ..معظم الاطفال باش منقولش الكل واضح جدا انهم ملقاوش لهوة فيما عدا التلفاز و الهاتف .... اكثر الاطفال ميعرفوش الالوان ميعرفوش يتكلمو .. ميعرفوش يتنقلو ميعرفوش يجريو ميعرفوش يقفزو ..ميستجيبوش للتعليمة معناها انت تقلو امشي يقعد يغزرلك الا ما تعاودهالو 3 مرات باش يقدم ساقو و يتحرك.. تحسهم مقاش يسمعوك.. تقول ماهمش مستانسين بأصوات آدمية ... راهو نحكي بالواقع و بشهادة العديد من الزملاء.. نسبة كبيرة متستجيبش للطلب مهما كانت بساطته ... بخلاف النوعية الاخرى من الأطفال الي توصل تضرب المنشطة و متحشمش و متخافش و تعيط عليك تقول انت الصغير و هو الكبير ووو
المهم انك تحاول باش تصلح و تقوم بواجبك و الفترة هذي المهمة اصعب مع الاطفال هاذم
أكثرهم محتاجين لعناية خاااااااصة و كل واحد وحدو ... و متنساش تعقيم اللعبة الاقلام الكرسي الطاولة بعد كل لمس موش مرة في النهار ... بخلاف لغتك الي تزادتلها كلمات مثل عقم ايديك.. متقربش .. متمسش...
الطلب الآن هو انو الولي يعاونا بكلمة حلوة... بتشجيع ..بتحمل المسؤولية معانا.. بضحكة... و دعوة خير ... مع الالتزام بالبروتوكول المطلوب منو : الحرص على النظافة ( الميدعة تتغسل يوميا تعلقها تصبح شايحة ).. تقلييييييييييييم الاظاااااافر.... ربط الشعر للفتيات .. قص الشعر للفتيان ... دبوزة الجال .. المحرار الشخصي.. تبدييييييلة نظيفة .... كروكس او حذاء نظيف يبقى في الروضة..
المواضبة على الوفاء بالالتزامات المادية في وقتها .. احنا عندنا التزامات ايضا و تزادت علينا ديون فترة الغلق ..
صحيح جميع القطاعات و الفئات تمست لكن بتظافر الجهود نجمو نستمرو بكلنا
و ربي يبعد علينا البلاء و الوباء و يحفظنا و يحفظ صغيراتنا
